საქართველოში პოლონეთის საელჩოს ორგანიზებით თბილისში საერთაშორისო კონფერენცია მიეძღვნა საბჭოთა ბლოკის სახელმწიფოებში პირველი დამოუკიდებელი შრომითი კავშირის „სოლიდარობისა“ და სსრკ-ში დისიდენტური მოძრაობის ისტორიას. 2 დღიანი ფორუმის მსვლელობისას აუდიტორიის წინაშე საერთაშორისო სამეცნიერო წრეების, დიპლომატიური კორპუსის, სახელმწიფო მმართველობითი ინსტიტუტებისა და ყოფილი დისიდენტური გაერთიანებების წევრების მიერ განსახილველად წარდგენილი თემები იმ დემოკრატიულ ფასეულობებს შეეხო, რომლებმაც თანამედროვე ევროპის განვითარების პროცესში მნიშვნელოვანი გავლენა იქონიეს. საკონფერენციო დისკუსიებმა სხვა საკითხებთან ერთად საქართველოსა და პოლონური სამოქალაქო მოძრაობა „სოლიდარობას“ შორის XX საუკუნის 80-90 იან წლებში თანამშრომლობის პროცესიც მოიცვა. კონფერენციაზე პრეზენტირდნენ ცნობილი ქართველი დისიდენტები: თამარ ბაღდავაძე, დავით ბერძენიშვილი, ლევან ბერძენიშვილი, თამარ ჩხეიძე, ვახტანგ ძაბირაძე, გურამ გობგაიძე, ტარიელ ღვინიაშვილი, ავთანდილ იმნაძე, ნანა კაკაბაძე, ზაქარია ლაშქარაშვილი, გელანიკოლეიშვილი, ვიქტორ რცხილაძე, ვახტანგ შონია, ირაკლი წერეთელიდა ვაჟა ჟღენტი. საქართველოში პოლონეთის საგანგებო და სრულუფლებიან ელჩთან მარიუშ მაშკიევიჩთან ერთად საპრეზენტაციო თემით - „ახლო წარსულის ხსოვნა“ კონფერენციის მონაწილეებს - კულტურული მემკვიდრეობის დაცვის სააგენტოს ხელმძღვანელიც მიესალმა. ქართულ-პოლონური ურთიერთობების ზოგადი კონტექსტის ფონზე ნიკოლოზ ანთიძემ აუდიტორიას კულტურული მემკვიდრეობის სფეროში არქეოლოგიური, საგანმანათლებლო და სამუზეუმო მიმართულებით 2 ქვეყნის თანამშრომლობის ის ეტაპები გააცნო, რომლებიც რამდენიმე წელია აქტიურად ვითარდება. * "სოლიდარობა", Solidarność, პოლონური პროფკავშირი, რომელიც 1980-იანი წლების დასაწყისში, საბჭოთა ბლოკის სახელმწიფოებში პირველი დამოუკიდებელი შრომითი კავშირი გახდა. "სოლიდარობა" 1980 წლის სექტემბერში დაფუძნდა. 1981 წლის დეკემბერში კი პოლონეთის ხელისუფლბამ მისი საქმიანობა არაკანონიერად სცნო, თუმცა 1989 წელს ორგანიზაცია კვლავ აღორძინდა და პირველი ოპოზიციური მოძრაობა გახდა, რომელმაც საბჭოთა ბლოკში, 1940 წლის შემდეგ, თავისუფალ არჩევნებში მიიღო მონაწილეობა. "სოლიდარობას" დაახლოებით 10 მილიონი წევრი ჰყავდა, რაც პოლონელ მშრომელთა უდიდეს ნაწილს აერთიანებდა.