საქართველოს კულტურული მემკვიდრეობის დაცვის ეროვნული სააგენტო კონფლიქტური ზონის გამყოფი ხაზისპირა სოფლების მცხოვრებლების მხარდაჭერის კამპანიაში ჩაერთო. შიდა ქართლის სამხარეო ადმინისტრაციის მიერ წამოწყებულ ინიციატივას, რომელიც გორის მუნიციპალიტეტის გამყოფი ხაზის მიმდებარე დასახლებების მოსახლეობისათვის სხვადასხვა ტიპის კულტურულ-საგანმანათლებლო ღონისძიების განხორციელებას ისახავს მიზნად, სააგენტოს საგანმანათლებლო სამსახური შეუერთდა. შემეცნებითი აქტივობები საგანმანათლებლო სამსახურის სპეციალისტების მიერ შემუშავებულ გაკვეთილებს მოიცავს, რომელიც პრაქტიკაში უკვე რამდენიმე წელია დაინერგა. პროგრამა „კულტურული მემკვიდრეობა ბაშვებს“ ეგიდით, საგანმანათლებლო ღონისძიების გეგმის პირველ ეტაპზე სასწავლო გაკვეთილები სოფელ ზერტის სკოლის მოსწავლეთათვის ჩატარდა. გაკვეთილი „მოზაიკა“-ს ფარგლებში, მოზარდები გაეცვნენ მოზაიკის ხელოვნების ისტორიულ მიმდინარეობას და განვითარების ეტაპებს. შემეცნებითი კურსის მსვლელობისას, პრაქტიკული მეცადინეობების გზით, სკოლის აღსაზრდელებმა მოზაიკის შექმნის ტექნოლოგიაც აითვისეს და საკუთარი ნამუშევრები შექმნეს. ღონისძიების ფარგლებში, ზერტის სკოლის ბიბლიოთეკას ქვეყნის მდიდარი კულტურული მემკვიდრეობის შესახებ სააგენტოს მიერ გამოცემული პუბლიკაციების კრებული საჩუქრად გადაეცა.