უფლისციხე საერთო ხედი

აქ ნახავთ: კლდეში ნაკვეთ ქუჩებსა და მოედნებს, წარმართულ ტაძრებს, სასახლეებს, სარიტუალო ქვაბულებს, დეკორირებულ კლდოვან დარბაზებს, პურის საცხობებს, საიდუმლო გვირაბსა და სხვ. აქვე იხილავთ უძველესი სამნავიანი ბაზილიკის ფრაგმენტებს, ნაქალაქარის ცენტრალურ ნაწილში, წარმართული ტაძრის ადგილას აღმართულ უფლისწულის ეკლესიას (ადრეშუასაუკუნეები), შუა საუკუნეების სახლებსა და დარბაზებს.

მუზეუმში წარმოდგენილია უფლისციხის ნაქალაქარსა და მის გარეუბნებში მოპოვებული არქეოლოგიური მასალა: მცირე პლასტიკის უნიკალური ნიმუშები, სამკაულები, საბრძოლო და სამეურნეო იარაღები, საკულტო-სარიტუალო ნივთები.

უფლისციხის კომპლექსს, მსოფლიო მნიშვნელობის მსგავს ძეგლთა შორის განსაკუთრებული ადგილი უკავია. კლდეში ნაკვეთი კომპლექსი ქალაქური ტიპის დასახლებას მიეკუთვნება. ელინისტურ და გვიან ანტიკურ ხანაში უფლისციხე ქვეყნის უმნიშვნელოვანესი რელიგიური, პოლიტიკური და კულტურული ცენტრი იყო. აქ გვხვდება როგორც წარმართული პერიოდის, ასევე ქრისტიანობის დროინდელი ძეგლები.